قطفو زهور الياسمين..

ليش قلبج يا بعد روحي حزين
و الله مو لايق عليج هذا الزعل
يا حلاتج يوم انتي تضحكين
افتحي قلبج و قولي وش حصل
من تجرأ من قطف هالياسمين
من حرم هالزين قبل لا يكتمل
مين كسر قلبه و شعوره بكلمتين
و يدري قلبه للعتب ما يحتمل
من هو ارخص قيمة الغالي الثمين
و يدري انه في عيوني له محل
من يقول الحب ما يقطر حنين
و من يقول انه وسط قلبي ذبل
يالله قومي يالله لا تتكيسلين
خلي حلمي واياج يوصل لين زحل
يالله قومي يالله لا تتشاورين
خلي حبنا يكون للعالم مثل
قالت اصبر قلت انتي تامرين
و طالعتني بعين يملاها الوجل
و لا اراديا ذرفت دمعتين
و قالت ان الزين ابد ما يكتمل
قلت قولي لي ترى سرج دفين
ما بخبر حد لو مهما حصل
بس دخيلج ما ابي هالدمع يبين
مب عشان شي بس و الله ما احتمل
طالعتني و قلت لها شو تطالعين
ما في داعي للعواطف و الخجل
هذا مب وقته في ويهي تسرحين
جاوبي احساس قلبي اللي سأل
قالت الشدة بعد فترة تلين
و الفرح يقبل اذا باقي امل
و الشقى لازم في يوم انه يهين
و الصعب ياتيه وقت و يكون سهل
قلت لها قولي لي و لا تلمحين
ما احب اسمع كلام به جدل
قولي شو الموضوع اذا انج تسمحين
و خلي الخوف اللي فيني يرتحل
قالت اهلي ساوموني بدرهمين
و قرروا انهم يزوجوني بعجل
ياه خطبني شخص بعمري مرتين
ويابوا المأذون و العقد اكتمل
وافقوا لانهم بماله طامعين
و بالتجارة و المراكز و الفلل
ليش لا دام انهم رابحين
يمكن انهم يطلعون بكم محل
قالت الحقني و مد لي اليدين
ضاع فكري و طار من راسي العقل
مين لي غيرك اشتكي له يالضنين
عطني رايك عطني لو ذرة امل
صرت انا واياك ضمن التايهين
و الحزن في دربنا توه استهل
ليش يا دنيا في ويهي تعبسين
حظي المايل متى بس يعتدل
قالت تكلم لو بس جملتين
لا تم ساكت ترى وردي ذبل
قول لي اي شي قول لو كلمتين
انت بس اللي لامره امتثل
صدمتي كانت معاها صدمتين
صدمت كانت فهالمرة دبل
كنت بسألها شو رايج تملجين
دام اخذنا الدبلة و الحب اكتمل
ما نطقت بشي و انا ميت حزين
و الدمع من فوق وجناتي همل
قمت اشاهق ما ابي نوحي يبين
كني خيل باعلى صرخاته صهل
قمنا نطالع بعض عين بعين
ما تكلمنا لين الليل حل
قالت انطق لا تقول انزين انزين
و انا ساكت و الفرح عني رحل
كنت اظن احنا لبعضنا مكملين
ما دريت ان الحظ عاند بالفعل
كنت انا وحدي في عالمها سجين
و كنت اقول الحظ اخيرا اعتدل
قلت لها اذكر كلامج لين الحين
يوم تقولي تراك لي احسن ريل
صحت فجأة و قلت لها تتذكرين
يوم كنا نخطط لشهر العسل ؟
قلت عشاني قومي و لا تزعلين
و ارضي بالواقع مدام انه حصل
اسمج بيبقى وسط قلبي دفين
و القمر لازم في يوم بيكتمل
و الله بفرح دام انتي بتفرحين
و يالله خلينا بعرسج نحتفل
اصفعتني كف عالخد و الجبين
و قالت انت قاعد تكلم طفل ؟
قلت لها وصوتي بنبراته حزين
اوعديني هالزعل اخر زعل
لانه قلبج ينعرف يوم تزعلين
و الله مب لايق عليج هذا الزعل
و مهما ناديتج ابد لا تجاوبين
قصة الحب انتهت مات البطل
افترقنا بعد كل هذي السنين
و للاسف حبنا في هالمرة فشل
انتهى مشوار احلى عاشقين
كل بدربه و لكن ابد ما وصل
كل واحد ينسى مع مر السنين
لكن الذكرى امرها مب سهل
لين اخر يوم في عيني تسكنين
و صورتج تبقى مثل بدر اكتمل
في بعض الاوقات اقعد مستكين
بس افكر لين يذبحني الملل
بالفعل قطفوا زهور الياسمين
قطفوا الزهرة قبل لا تكتمل


الشاعر طارق المحياس...